*👈توبہ کرنے کا ایک طریقہ*
توبہ کرنے کا ایک طریقہ یہ بھی ہے کہ تنہائی میں دورکعت صلوٰۃ التوبہ پڑھے پھر اپنی نافرمانیوں اور رب تعالیٰ کے احسانات ، اپنی ناتوانی اور جہنم کے عذابات کو یاد کر کے آنسو بہائے ،اگررونا نہ آئے تو رونے جیسی صورت ہی بنا لے ۔ اس کے بعد توبہ کی شرائط کو مدِ نظر رکھتے ہوئے رب تعالیٰ کی بارگاہ میں معافی طلب کرے اور کچھ اس طرح سے دعا کرے :
’’ اے میرے مالک ! تیرا یہ نافرمان بندہ جس کا رُواں رُواں گناہوں کے سمندر میں ڈوبا ہوا ہے ، تیری پاک بارگاہ میں حاضر ہے، یا اللہ عزوجل ! میں اقرار کرتا ہوں کہ میں نے دن کے اُجالے میں رات کے اندھیرے میں ، پوشیدہ اوراعلانیہ ، دانستہ اور نادانستہ طور پر تیری نافرمانیاں کی ہیں ، یقیناََ میں نے تجھے ناراض کرنے میں کوئی کسر نہیں چھوڑی لیکن اے مولا ! تُو غفور ورحیم ہے، تُو بندے پر اس سے زیادہ مہربان ہے جتنا کہ ایک ماں اپنے بچے پر شفقت کرتی ہے ، اے اللہ پاک ! اگر تُو نے میرے گناہوں پر پکڑ فرمائی تو مجھے نارِ جہنم میں جلنا پڑے گا جس کا عذاب لمحہ بھرکے لئے بھی سہنے کی مجھ میں طاقت نہیں ، اے اللہ پاک ! میں صدقِ دل سے تیری بارگاہ میں اپنے گناہوں سے توبہ کرتا ہوں ، یااللہ پاک میری ناتوانی پر رحم فرما، اے میرے پرورد گار! میرے گناہوں کومعاف فرمادے ، اے میرے پرورد گار اللہ عزوجل! میرے گناہوں کومعا ف فرمادے ، اے میرے پرورد گار اللہ عزوجل! میرے گناہوں کو معاف فرمادے ، اے میرے مولا اللہ پاک ! مجھے سچی توبہ کی توفیق دے ، جو عبادات ادا ہونے سے رہ گئیں انہیں ادا کرنے کی ہمت دے دے ، جن بندوں کے حقوق میں نے تلف کئے ان سے بھی معافی مانگنے کا حوصلہ عطا فرما ، اے اللہ پاک! تُو ہرشے پر قادر ہے ، تُو انہیں مجھ سے راضی فرمادے ، یااللہ پاک! مجھے آئندہ زندگی میں گناہوں سے بچنے پر استقامت عطا فرما ، اے اللہ عزوجل! مجھے اپنے خوف سے معمور دل، رونے والی آنکھ اور لرزنے والا بدن عطا فرما ۔ آمین بجاہ النبی الامین ﷺ ۔‘‘
اس کے بعد اس جگہ سے اس یقین سے اٹھے کہ رحیم وکریم پروردگار اللہ عزوجل نے اس کی توبہ قبول فرما لی ہے ۔ پھر ایک نئے عزم کے ساتھ نئی اور پاکیزہ زندگی کا آغاز کرے اور سابقہ گناہوں کی تلافی میں مصروف ہوجائے ۔ اللہ تعالیٰ ہمارا حامی وناصر ہو ۔ آمین بجاہ النبی الامین ﷺ۔
*اگر آپ کو یہ تحریر (Post) پسند آئی ہو تو اپنے دوست و احباب کو ضرور شیئر کریں*
ایک تبصرہ شائع کریں