بیٹے بھی پرائے ہو جاتے ہیں۔۔۔
ایک خاموش جدائی کی کہانی !
٭٭٭٭٭٭٭٭٭٭٭٭٭٭٭٭٭٭٭٭٭٭
ہماری تہذیب میں بیٹیوں کی رخصتی کو ایک عظیم قربانی اور جذباتی لمحہ سمجھا جاتا ہے۔ماں باپ کی آنکھیں اشکبار ہوتی ہیں،بہن بھائی دل تھام کر کھڑے ہوتے ہیں،اور ہر چہرہ اداسی کی تصویر بن جاتا ہے۔
مگر کیا کبھی ہم نے سوچا کہ بیٹے بھی تو ایک دن اپنے ہی گھر سے رخصت ہو جاتے ہیں؟
بس فرق یہ ہے کہ ان کی رخصتی خاموش ہوتی ہے،بغیر رسم کے،بغیر آنسو کے،بغیر بین کے۔۔۔ صرف ایک دعا اور ایک نظر کے ساتھ۔
بیٹے، جن کی ذمہ داریاں عمر کے ساتھ بڑھتی ہیں،جن کا کندھا معاش کا بوجھ اٹھاتا ہے،جو اپنے جذبات چھپا کر باہر کی دنیا سے لڑنے نکلتے ہیں،وہ کب کے ماں باپ کے گھر سے دور ہو چکے ہوتے ہیں۔
کوئی پردیس میں ہے،کوئی شہر بدر،کوئی صبح سے رات تک محنت میں مگن،اور کوئی تھکا ہارا روزی روٹی کی چکی میں پسا ہوا۔
یہ بیٹے کسی کے بھائی ہیں،کسی کے شوہر،کسی کے بیٹے، اور کسی کے باپ۔۔۔
مگر اصل میں یہ سب سے پہلے انسان ہیں،جذبات رکھنے والے،درد سہنے والے، مگر اکثر خاموش رہنے والے۔
کسی ماں کو شکایت ہے کہ بیٹا ہفتوں سے نہیں آیا،کسی باپ کا دل بیٹے کے بغیر سنسان ہے،بہن کو بھائی کی آواز ترسا دیتی ہے،بیوی کو شوہر کا لمس یاد آتا ہے،اور بچے باپ کے چہرے کو خواب میں ڈھونڈتے ہیں۔
مگر وہ بیٹا جو اِن سب کی چاہت ہے،خود اپنے آپ کو کھو بیٹھا ہے۔
دن میں محنت،رات میں فکر،اور درمیان میں اپنی خوشی،اپنی نیند،اپنا سکون قربان کر چکا ہوتا ہے۔
ہم بیٹیوں کے رخصت ہونے پر آنسو بہاتے ہیں،خوبصورت اشعار کہتے ہیں، مہندی لگاتے ہیں،دعائیں دیتے ہیں۔۔۔
مگر بیٹوں کی رخصتی؟
وہ تو بس ایک بیگ،ایک ٹرین یا بس کی روانگی،اور ماں باپ کی چپ کے سائے میں ہوتا ہے۔
یہ مضمون صرف ایک احساس ہے — ان ہزاروں بیٹوں کے لیے جو خاموشی سے گھر سے دور اپنی دنیا بناتے ہیں،تاکہ ان کے پیاروں کی دنیا محفوظ رہے۔
یہ ایک خراجِ تحسین ہے اُن مردوں کے لیے،جو گھر والوں کی خوشیوں کے لیے اپنی خوشیاں قربان کرتے ہیں،اور کبھی جتاتے تک نہیں۔
اللہ سب کے بیٹوں کو سلامت رکھے،آمین،یا رب العالمین۔
ایک تبصرہ شائع کریں