Mera BAAP Kam Na Tha Meri MAA Say

Azeez’tar woh mujhe rakhta tha ragg-e-jaan say,Yeh baat sach hai mera Baap kam na tha meri Maa say,

Woh Maa kay kehne pe kuch roub mujh pay rakhta tha,Yehi wajah thi mujhe choomtay jhijhkta tha,

Woh aashna mere har karb se raha har dum,Jo khul ke roo nahin paya magar sisakta tha,

Jurri thi uski har ek haan faqat meri haan say,Yeh baat sach hai mera Baap kam na tha meri Maa say,

Har ek dard woh chup chaap khud pe sehtaa tha,Tamam umar woh apnon se katt kay rehta tha,

Woh laut’ta tha raat deir tak din bhar,Wajood uska paseenay mein thall kay behta tha,

Gilay they mujhe phir bhi aesay chaak-daama say,Yeh baat sach hai mera Baap kam na tha meri Maa say,

Purana suit pehenta tha kam woh khaata tha,Magar khiloney mere sab woh khareedta tha,

Woh mujh ko soye huye dekhta tha jee bhar kay,Na jane soch ke kya kya woh muskuraata tha,

Mere beghair they sab khawab us kay wiraan say,Yeh baat sach hai mera Baap kam na tha meri Maa say...!